Fusa nettradio

Flytting av radiosida!

2006-07-06T05:28:06+02:00

Fusa nettradio blir no gradvis flytta over til den sida som vi legg ut podkastane våre på: http://web.mac.com/aslekaldestad. Då blir det enklare for deg som lyttar òg, sidan du slepp å forhalde deg til 2 sider. På den nye sida vil det difor vere podkastar av sendingane våre, tekst, bileter og kanskje små videoklipp frå radiostudioet. Men kvifor har den nye adressa til radiokanalen aslekaldestad i namnet? Vel, dette er fordi Asle Kaldestad er ansvarleg redaktør av Fusa nettradio. Han har òg eit musikkfirma ved namn Fusa-musikk, og Fusa nettradio er eit tilbod til deg frå Fusa-musikk. Difor vil den nye sida vere ei side med både innhald frå Fusa-musikk og Fusa nettradio. På den måten får du òg sett kva som skjer i Fusa-musikk (hovudsakleg komponering av musikk og sal av den). Og vi trur det vil skje mykje spennande samansmelting mellom nettradioen og musikkfirmaet. Vi gler oss! Du kjem til den nye sida ved å klikke på podkastlenka vi har lagd ut til venstre på skjermen her.

Redaksjonen som likar godt dei nye sidene

1. kapittel av 1. sending er klar for lytting!

2006-07-06T04:22:00+02:00

Sidan alt styret med kassettbandet vårt har gjort at 1. sending blei så forsinka, legg vi den no ut kapittelvis etterkvart som vi klarar å få den over frå kassettbandet til data og Internett. Og 1. kapittel er no tilgjengeleg på http://web.mac.com/aslekaldestad (kanskje vi bør leggje denne adressa ut som ein direktelenk til venstre på skjermen her). Så ved å klikke inn der kan du no høyre starten på sendinga som blei gjort her i radiostudioet laurdag 24. juni. Etterkvart som fleire kapittel blir klare vil vi leggje dei til det som allereie ligg tilgjengeleg, og podkasten oppdaterar seg, slik at du alltid har den nyaste versjonen tilgjengeleg. Vi ønskjer deg god lytting!

Redaksjonen som er "litt" lei av kassettformatet no

Jinglar!

2006-07-05T05:08:13+02:00

Eit radioprogram har gjerne mange jinglar, altså reklamar for programmet ein lagar. Desse jinglane kjem no og då i løpet av eit program, for å minne lyttarane om kva dei høyrer på, for å dele opp programmet dersom ein skal skifte samtaleemne og fordi det høyres tøft ut! Vi i Fusa nettradio lagar fortløpande nye jinglar til våre sendingar, og her kan du høyre ein av våre jinglar: http://web.mac.com/aslekaldestad. Sidan fyrste sending tek så lang tid å få ut på nettet på grunn av den stakkars kassetten, må vi kunne tilby noko å lytte på i mellomtida.

Redaksjonen

Reklame for 1. sending!

2006-07-02T05:43:36+02:00

Sidan det tek så lang tid å få det nytørka kassettbandet inn i kassetthuset att, har vi no laga ei lita reklame for 1. sending! Den ligg tilgjengeleg som lyd på http://web.mac.com/aslekaldestad

Redaksjonen

Nyvaska radiosending!

2006-07-02T06:43:58+02:00

Jau, jammen sa vi mirakel: Det viste seg at vi gløymde å trykkje Lagre før vi slo av dataen i går, så no er heile den utstrakte sendinga vår vekk! Vi skulle så til å finne den fram på kassett att, men det viste seg òg at den eine redaksjonsassistenten vår hadde putta kassetten i bukselommma og gløymd å ta den ut att før buksa blei slengd i vaskemaskina! Heldigvis gjekk vasken så forsiktig for seg tydelegvis at opptaket framleis var høyrbart då vi fann det att. Faktisk høyrdes lyden litt reinare ut etter vask (!), så vi fann ut at vi berre beheld opptaket slik, utan å fjerne meir støy no. For å få programmet i lang nok lengde tok vi òg å strakk litt i sjølve kassettbandet, og jammen hjalp det! La oss håpe at vi får lagd det ut på lufta i morgon, for no fyrst må vi lufte bandet litt, så det tørkar.

Redaksjonen som trekk både i kassett- og smileband

Eit mirakel!

2006-06-30T05:59:30+02:00

Vi klarte heldigvis å strekkje programmet ut til 2 timar att ved hjelp av moderne datateknologi. Men no når vi høyrer på sendinga så høyres det mildt sagt ut som om vi dreeeeeg veldig på enkelte vokalar medan vi snakkar, for ikkje å snakke om musikken som er med i sendinga. Den høyres ut som den er litt ute av takt heile tida no. Hm, vi veit ikkje heilt kva vi skal gjere, så i mangel av ein betre idé let vi det langstrakte opptaket liggje på datamaskina til i morgon og håpar at det skal ha skjedd eit mirakel med det innan den tid og at det då er perfekt!

Redaksjonen som kryssar fingrar og tær

Dette byrjar å bli ei farse!

2006-06-28T21:39:44+02:00

Etter at vi la kassettopptaket av den fyrste sendinga over på data for å renske litt opp i den susete lyden, oppdaga vi plutseleg at programmet hadde blitt kortare etter å ha gjennomgått den prosessen! Kvifor veit vi ikkje heilt. Så no sit vi og strekkjer sendinga ut att via avanserte funksjonar vi ikkje går i detalj på her. Vi håpar at vi skal klare å få sendinga til å bli på 2 timar att, som den var på opprinneleg då vi spelte inn programmet laurdag 24. juni! Etterpå skal vi ha bandsalat til nattmat!

Redaaaksjoooooneeeeeeeeeen